Nýjum gervigrasvelli fagnað

Nýr upphitaður og flóðlýstur gervigrasvöllur var formlega tekinn í notkun í Reykjanesbæ í síðustu viku. Völlurinn er vestan við Nettóhöllina sem er fjölnota knattspyrnuhöll. Það voru yngstu iðkendur knattspyrnu í Reykjanesbæ, í 7. flokki drengja og stúlkna frá knattspyrnudeildum UMFN og Keflavíkurvíkur, sem stilltu sér upp til myndatöku við nýja völlinn en síðan var dagskrá flutt inn í Nettóhöllina þar sem Reykjanesbær afhenti formlega íþróttafélögunum tveimur, Keflavík og UMFN, völlinn til afnota. 

Gervigrasið er það besta sem völ er á í dag og völlurinn uppfyllir allar kröfur sem gerðar eru til knattspyrnuvalla í Evrópukeppnum. Völlurinn er í dag æfingavöllur en þegar byggð hefur verið áhorfendastúka og búningsaðstaða verður hægt að leika þar á Íslandsmótum í knattspyrnu. Forráðamenn UMFN og Keflavíkur lýstu yfir mikilli ánægju með þetta framfaraskref.

Knattspyrnufólk UMFN og Keflavíkur í 7. flokki stilltu sér upp á nýja gerfigrasvellinum.

Eva Stefánsdóttir, formaður íþróttaráðs Reykjanes­bæjar, með formönnum knattspyrnudeildanna, Brynjari Frey Garðarssyni frá UMFN og Sigurði Garðarssyni frá Keflavík. VF-myndir: pket

Valdimar söng við vígslu vallarins.

Eigendur pípulagningafyrirtækisins JBÓ afhentu Keflavík og Njarðvík styrki sem formenn félaganna tóku við.