Íþróttir

Þeir Brenton og Teitur munu takast á við unga og spræka Njarðvíkinga. Á hinni myndinni má sjá þá Jóhann Árna Ólafsson og Guðmund Jónsson sem leika með Grindavík og Þór Þ.

Mánudagur 17. desember 2012 kl. 07:07

Njarðvíkur stjörnuleikur til góðs

Föstudagskvöldið 21. desember fer fram sannkallaður stórleikur í Ljónagryfjunni í Njarðvík. Þar munu mætast heimamenn í Njarðvík og stjörnum prýtt lið fyrrum leikmanna félagsins sem ýmist leika annarsstaðar eða hafa lagt skóna á hilluna. Þar er valinn maður í hverju rúmi og meðal þeirra sem ætla að taka fram skóna og spreyta sig eru leikmenn á borð við Teit Örlygsson, Ísak Tómasson, Friðrik Ragnarsson, Jeb Ivey, Brenton Birmingham og Loga Gunnarsson. Þjálfarar eru ekki af verri endanum en þeir Friðrik Ingi Rúnarsson og Gunnar Þorvarðarson munu halda um stjórnartaumana á liðinu sem samtals á að baki 51 Íslandsmeistaratitil.

Allur ágóði af leiknum rennur til l Líknarsjóðs Njarðvíkurkirkna. Aðgangseyrir á leikinn er 1000 krónur fyrir fullorðna og 500 krónur fyrir börn auk þess sem fólk getur styrkt gott málefni með frjálsum framlögum.

Í hálfleik verður svo haldin þriggja stiga keppni þar sem miklar skyttur mæta til leiks.

Dómarar leiksins eru miklir reynsluboltar og Njarðvíkingar en þeir Sigmundur Már Herbertsson og Kristján Möller munu dæma leikinn. Kynnir leiksins verður svo Njarðvíkingurinn Þórður Helgi Þórðarson á Rás 2. Leikurinn hefst klukkan 20:00.

Nánar á umfn.is.