Njarðvík tapaði stórt í Borgarnesi

Skallagrímur skellti toppliði Njarðvíkur í Borgarnesi í gær 96 – 78 og gerði George Byrd 21 stig í leiknum fyrir Skallagrím ásamt því að hirða 15 fráköst. Þetta var annar tapleikur Njarðvíkinga í deildinni en Grindvíkingar urðu fyrstir liða til að leggja Njarðvík að velli í Iceland Express deildinni á þessu tímabili.

Jeb Ivey var stigahæstur í liði Njarðvíkur með 21 stig en Friðrik Stefánsson gerði 20 ásamt því að taka 11 fráköst.

Njarðvíkingar leiddu mest allan 1. leikhluta en heimamenn hertu róðurinn og lauk leikhlutanum í stöðunni 18 – 18. Skallagrímur tók á honum stóra sínum í 2. leikhluta og náðu forystu og gengu liðin til hálfleiks í stöðunni 47 – 35 Skallagrím í vil eftir að Heiðar Lind Hansson gerði sín fyrstu og einu stig í leiknum með flautukörfu yfir Egil Jónasson í liði Njarðvíkinga.

Njarðvíkingar sóttu í sig veðrið í 4. leikhluta og minnkuðu muninn í 77 – 71 en lengra komust þeir ekki því Skallagrímur svaraði um hæl með því að gera 13 stig á móti 5 frá Njarðvík og þar með voru stigin tvö nelgd í Borgarnesi. Lokatölur 96 – 78 eins og áður greinir.

„Það var fyrst og fremst hugarfarið sem klikkaði hjá okkur,“ sagði Einar Árni, þjálfari Njarðvíkinga, í samtali við Víkurfréttir. „Hugarfar okkar var engan veginn í samræmi við leikinn, þetta er erfiður útivöllur og við vorum ekki tilbúnir í þann fasta leik sem þeir voru að spila. Við létum ýta okkur út úr öllum okkar aðgerðum og Skallagrímsmenn mættu bara hungraðri en við,“ sagði Einar að lokum.

Tölfræði leiksins