Minningarmót um Ragnar Margeirsson í Reykjaneshöllinni í dag

Það verða margar fyrrverandi knattspyrustjörnur sem munu sprikla í Reykjaneshöllinni síðdegis í dag þegar minningarmót um Ragnar heitinn Margeirsson, landsliðsmann í knattspyrnu, fer fram. Allur ágóði af mótinu mun renna til styrktar fjölskyldu Sigursteins heitins Gíslasonar. Mótið er ætlað eldri drengjum eins og það er orðað í tilkynningu frá vinum Ragnars. Mótið hafa þeir nokkrum sinnum haldið áður en um tíu ár eru liðin frá andláti Ragnars sem gerði garðinn frægan á sínum tíma með Keflavík, Fram og KR hérlendis en einnig í Belgíu og í Þýskalandi. Ragnar hefði orðið fimmtugur á þessu ári.

Afraksturinn af mótinu rennur iðulega til góðra málefna og að þessu sinni rennur hann óskiptur til fjölskyldu Sigursteins sem tók sjálfur oft þátt í minningarmótinu. Styrktaraðili sem ekki vill láta nafns síns getið mun greiða þann kostnað sem af mótinu hlýst.

Allir eru velkomnir í Reykjaneshöllina í dag til að sjá skemmtilega knattspyrnutakta.

Á myndinni að ofan er Sigurður Björgvinsson með boltann í mótinu í fyrra en hann er einn af mörgum þekktum fyrrverandi knattspyrnuköppum sem koma í mótið.