Mikilvægur sigur á heimavelli

Keflvíkingar unnu sigur á Fram á heimavelli sínum, 2-1, í kvöld og halda því enn í við toppliðin tvö, Val og FH.

Lengst af var leikurinn lítið fyrir augað og var ekki mikið um góð færi. Ívar Björnsson komst nærri því að skjóta gestunum yfir á 9. mínútu þegar hann var kominn inn fyrir vörnina, en skaut framhjá.

Fimm mínútum síðar leit fyrsta markið dagsins ljós þegar Þórarinn Kristjánsson, sem hefur verið á skotskónum undanfarið, skallaði framhjá Hannesi Halldórssyni í marki Framara. Kæruleysi gestanna skóp það færi því Guðjón Árni Antoníusson fékk lausan bolta aftarlega á kantinum. Hann gaf á Guðmund Steinarsson, sem fékk nógan tíma til að athafna sig fyrir utan teig og sendi góðan bolta inn á markteig þar sem Þórarinn átti ekki í erfiðleikum með að klára dæmið.

Eftir um hálftíma leik var Baldur Sigurðsson nærri því að auka forskotið en hann skallaði rétt framhjá.

Á 33. mínútu jöfnuðu Framarar þegar Hjálmar Þórarinsson slapp einn innfyrir eftir góðan undirbúning og taldist það sanngjarnt því gestirnir höfðu átt jafn mikið í leiknum.

Undir lok fyrri hálfleiks skall hurð nærri hælum þegar Marko Kotilainen átti skot af löngu færi í stöng Framara.

Keflvíkingar voru sterkari aðilinn í seinni hálfleik, en samt voru þeir ekki að spila eins góðan bolta og þeir eru jafnan þekktir fyrir.

Á 55. mínútu gerðu varnarmenn Fram sig enn seka um værukærð þegar Guðmundur Steinarsson var enn á ferð á kantinum, sendi stutta fyrirgjöf inn í teiginn þar sem Baldur Sigurðsson kom skeiðandi að gömlum sið, stakk boltanum fram hjá Hannesi og þrumaði boltanum upp í þaknetið.

Eftir það datt leikurinn niður að mestu, en þau fáu færi sem litu dagsins ljós það sem eftir lifðu leiks voru heimamanna. Það besta fékk Hallgrímur Jónasson á 78. mínútu þegar hann vippaði yfir Hannes og markið í upplögðu færi.

Eftir sigurinn er Keflavík, sem fyrr, í 3. sæti. Þeir eru einu stigi á eftir Val og fimm stigum á eftir meisturum FH.