Logi líklega með í kvöld

Bakvörðurinn reyndi Logi Gunnarsson verður hugsanlega með Njarðvík gegn Stjörnunni í rimmu liðanna í 8-liða úrslitum í körfunni. Logi handarbrotnaði í leik gegn Þórsurum þann 4. mars þannig að hann hefur verið á hliðarlínunni síðan. Í samtali við Karfan.is sagði Logi að hann yrði í búning og myndi sjá til hvernig honum liði eftir upphitun. „Ég hef lauslega verið að prófa hendina með ágætum árangri. Ég verð í búning í kvöld og við sjáum hvernig ég verð eftir upphitun,“ sagði Logi.

Staðan í einvíginu er 2-1 Njarðvík í vil og þeir grænu freista þess að klára dæmið í kvöld. Búist er við troðfullri Ljónagryfju og því er vissara að mæta snemma til þess að fá stemninguna beint í æð. Hvernig fer annars í kvöld? Spáðu í spilin hér að neðan.