Leikir vikunnar í körfunni
Tindastóll-Njarðvík
Njarðvíkingar mæta í Krókódílasíkið svokallaða í kvöld þar sem þeir leika gegn Tindastóli í Intersport-deildinni. Njarðvíkingar eru á toppi deildarinnar með eitt tap á meðan Tindastóll er í einu af neðstu sætunum í spennandi keppni í neðri hlutanum. Einar Árni Jóhannsson, þjálfari Njarðvíkur, býst við hörkuleik. „Þetta verður erfiður leikur. Það er klárt mál. En við ætlum okkur sigur og að halda toppsætinu fram að jólum.“
KFÍ-Grindavík
Grindvíkingar virðast komnir á beinu brautina í Intersport-deildinni á ný. Í kvöld mæta þeir KFÍ á Ísafirði og er Páll Axel Vilbergsson, fyrirliði þeirra, viss um að leikurinn verði ekki auðveldur þrátt fyrir slaka frammistöðu Ísfirðinga framan af vetri. „Við höfum alltaf þurft að hafa fyrir sigrunum á Ísafirði og þessi leikur verður engin undantekning. Við höfum verið að spila betur undanfarið, en getum samt ekki leyft okkur að vera værukærir.“
Keflavík-Skallagrímur
Keflvíkingar mæta Borgnesingum, öðru spútnikliði vetrarins, í kvöld. Nýliðum Skallagríms hefur gengið flest í haginn hingað til, en nú verður leikið í Sláturhúsinu. Þar hafa Keflvíkingar ekki tapað deildarleik í háa herrans tíð og þurfa lærisveinar Vals Ingimundarsonar að hafa sig alla við og treysta á lukkuna. „Skallagrímur er með flott lið sem hefur komið á óvart í vetur, þannig að við mætum á fullu í þennan leik,“ segir Sigurður Ingimundarson, þjálfari Keflvíkinga. „Við höfum ekki verið að leika nógu vel í deildinni og stefnum á að bæta úr því.“
Keflavík-Grindavík
Grannaliðin Keflavík og Grindavík eigast við í 1.deild kvenna á heimavelli hinna fyrrnefndu á miðvikudaginn. Keflavík hefur borið höfuð og herðar yfir önnur lið í vetur en Grindavíkurstúlkur hafa sýnt góða takta að undanförnu og verða ekki auðveld bráð. Sverrir Þór Sverrisson, þjálfari Keflavíkur, segir góðan anda ríkja í sínum herbúðum eftir sigurinn í hópbílabikarnum um síðustu helgi. „Stemmningin hjá okkur er fín. Það er stutt í Jólafrí og við ætlum okkur að vinna alla leiki fram að jólum til að hafa þægilegt forskot þegar að því kemur.“ Erla Þorsteinsdóttir hjá Grindavík segir ófarirnar gegn Keflvíkingum í Hópbílabikarnum á dögunum ekki hafa áhrif á þennan leik. „Við erum búnar að gleyma honum og stefnum á að vinna þennan leik. Við höfum verið á réttri leið að undanförnu og stígandinn góður í hópnum og stefnum á að gera enn betur.“
ÍS-Njarðvík
Njarðvíkingar mæta Stúdínum í 1. deild kvenna í körfuknattleik á mánudag. ÍS hefur spilað vel í vetur en Agnar Mar Gunnarsson, þjálfari Njarðvíkinga, segir að sigur sé möguleiki. „Þær eru að spila á litlum hópi þannig að ef við mætum tilbúin til leiks og nýi leikmaðurinn kemur vel út eigum við að geta unnið þær.“
