„Leggja leikmenn okkar í hættu“

Grindvíkingar töpuðu stórt gegn KR-ingum í úrslitaleik Lengjubikarsins í fótbolta karla í gær. Lokastaðan 4-0 þar sem Njarðvíkingurinn og fyrrum leikmaður Grindavíkur, Óskar Örn Hauksson, var einn markaskorarar KR. Tvær vikur eru þar til Íslandsmótið í knattspyrnu hefst en Grindvíkingar munu núna leika í Pepsi-deildinni eftir fjögur ár í 1. deild.

Grindvíkingar voru að leika sinn sjötta leik á 18 dögum og var þjálfarinn Óli Stefán ósáttur út í KSÍ.

„Satt að segja þá skil ég ekki KSÍ að setja okkur í þessa stöðu, einfaldlega vegna þess að þeir leggja leikmennina okkar í hættu en ég er ekki maður afsakana. Ég tek stöðuna eins og hún er og reyni frekar að horfa á það sem við fáum út úr þessu. Það sem að gerist er að leikmenn sem hafa verið að bíða eftir tækifæri, fá tækifæri á stórri stundu og standa sig vel. Ég skil ekki KSÍ að setja leikmenn í þessa stöðu tveimur vikum fyrir mót,“ sagði þjálfarinn í samtali við fótbolta.net í leikslok.