LANDSBANKINN Í SANDGERÐI

Á föstudaginn var haldið upp á 35 ára afmæli Landsbankans í Sandgerði. Í tilefni dagsins var viðskiptavinum bankans boðið upp á kaffi og kökur auk einhvers góðgætis fyrir yngri kynslóðina.Landsbankinn í Sandgerði hóf starfsemi sína sem afgreiðsla frá Grindavíkurútibúi 31. janúar 1964. Breyting varð svo 1983 þegar afgreiðslan í Sandgerði var færð undir útibú Landsbankans á Keflavíkurflugvelli. Þriðja og stærsta breytingin varð 1. september 1985 er stofnað var sjálfstætt útibú og var fyrsti útibússtjóri Jónas Gestsson.Á þessum tíma hefur vöxtur og uppgangur á svæðinu verið mikill sem leitt hefur til gífurlegrar eftirspurnar lánsfjár, enda sjávarútvegur og þjónusta í kringum hann nánast eini atvinnuvegurinn á staðnum. Til að sinna svæðinu varð Sandgerðisútibú oft á tíðum að lána allt að 3-4 sinnum meira en það hafði afl til sjálft. Þannig hefur þetta tiltölulega litla útibú staðið undir og stuðlað að hinni gífurlegu uppbyggingu sem átt hefur sér stað hin síðari ár.