Kláruðu tímabilið með stæl

Njarðvíkingar sigruðu Víðir, 2-0, á Víðisvelli í Garði í síðasta leik sumarsins í 2. deild karla í knattspyrnu á föstudag og kláruðu þannig frábært tímabil á viðeigandi hátt en eins og flestir vita höfðu þeir þegar tryggt sér sæti í 1. deild á næsta tímabili. Bæði mörk Njarðvíkinga komu í síðari hálfleik, það fyrra skoraði Sverrir Þór Sverrisson með skoti beint úr aukaspyrnu en það síðara skoraði Sævar Gunnarsson.Njarðvíkingar enduðu í 2. sæti í deildinni með 42 stig en HK varð í efsta sæti með 47 stig. Víðismenn áttu frekar erfitt sumar en þeir lentu í 6. sæti deildarinnar með 24 stig.
Markamaskínurnar Eyþór Guðnason og Sævar Gunnarsson voru í 2. og 3. sæti yfir markahæstu leikmenn 2. deildar, Eyþór með 16 mörk en Sævar með 15.

Þess má til gamans geta að í sérblaði TVF um fótboltan á Suðurnesjum fyrr í sumar var Njarðvíkingum spáð í 6. sæti deildarinnar og Víðismönnum var spáð í 4. sæti. Sú spá gekk því ekki eftir og þó svo við hefðum verið nokkuð nálægt með Víðismenn þá stóðu Njarðvíkingar af sér allar spár og áttu frábært tímabil eins og áður sagði.