Keppendur komnir af Alþjóðaleikum fatlaðra

Eins og áður hefur verið getið þá stóðu yfir Alþjóðaleikar fatlaðra í Aþenu í Grikklandi á dögunum. 7000 keppendur frá 180 þjóðum keppa í 22 íþróttagreinum. 37 Íslendingar kepptu í hinum ýmsu greinum og stóðu sig frábærlega og unnu marga sigra. Í knattspyrnuliðinu sem fór héðan voru Suðurnesjamenn, þeir Sigurður Guðmundsson og Guðmundur Markússon en liðið vann til silfurverðlauna eins og fram hefur komið áður hér á vf.is.

Annar Suðurnesjamaður tók þátt í leikunum en hann keppti í frjálsum íþróttum. Sá heitir Jakob Gunnar Lárusson og er úr Reykjanesbæ. Hann náði að landa bronsi í langstökki og varð fimmti í 100m hlaupi, sannarlega frábær árangur hjá kappanum.

Hópurinn kom heim seint í gærkvöldi eftir að hafa hafa dvalið í Grikklandi í miklum hita og smávægilegum óeirðum. Keppendur skemmtu sér hið besta og heppnaðist ferðin gríðarlega vel. Vilja keppendur og aðstandendur þakka þeim fjölmörgu stuðningsaðilum fyrir þeirra framlag.