KEFLVÍKINGAR VIÐ STJÓRNVÖLIN
Þegar það stoltið var lagt að veði sýndu Keflvíkingar fram á hverjir ráða málum í körfuboltanum, innanbæjar sem og á landsvísu. Jólalykt var af leik bestu liða landsins en einnig úrslitakeppnisbragur, í sínum hvorum hálfleiknum. Njarðvíkingar léku stórvel í fyrri hálfleik bæði í sókn sem vörn og virtust oft hreinlega fleiri en Keflvíkingar á vellinum, hjálparvörn þeirra markviss og tókst þeim oftar en ekki að stela slökum sendingum heimamanna og skila niður hraðaupphlaupskörfum sem skilaði þeim ,,öruggri” forystu í hálfleik 35-54. Í upphafi seinni hálfleiks var aðeins eitt lið á vellinum, Keflvíkingar, sem skoruðu 20 stig í röð og komust yfir 55-54. Leikurinn var eftir þessa flugeldasýningu í jafnvægi en Keflvíkingar miklu ákveðnari og tilfinningin alltaf sú að sigurinn yrði þeirra. Á lokamínútunum hrundi leikur Njarðvíkinga eins og spilaborg og Keflvíkingar fögnuðu sigri 89-80. Mikið var um falleg tilþrif í sókn og vörn hjá báðum liðum en í sínum hvorum hálfleiknum. Friðrik Stefáns, Teitur, Brenton og Hermann voru bestir Njarðvíkinga, í þessari röð og spilaði Friðrik þarna án efa sinn besta leik í Njarðvíkurbúningnum. Erfiðara er að gera upp á milli heimamanna en segja má að þeir Gunnar, Hjörtur og Birgir hafi tendrað neistann og þeir Guðjón, Falur og Damon hlúð að loganum þar til áhorfendastæði Keflvíkinga stóðu í björtu báli. ,,Liðið gerði einfaldlega ekkert af því sem lagt var upp með fyrir leikinn og staðan orðin mjög slæm í hálfleik en leikmenn mínir sýndi gríðarsterkan karakter í seinni hálfleik og sneru leiknum gjörsamlega við” sagði Sigurður þjálfi að leik loknum. Ekki verður séð að nokkurt lið ógni Keflvíkingum fyrst þeim tókst að snúa tapaðri stöðu í sigur gegn því liði sem margir telja einu raunhæfu hindrunina að þeim titlum sem eftir eru í boði á tímabilinu. Liðið lék ákafan og harðan varnarleik í seinni hálfleik, vörn sem hinir 5 landsliðsmenn Njarðvíkinga fundu engin svör gegn ásamt því að skora oftsinnis af harðfylgi úr vægast sagt afar erfiðum færum, sérstaklega Guðjón og Birgir.
