Keflavík byrjar á sigri í Bestu deild karla

Besta deild karla í knattspyrnu hófst í dag og Keflvíkingar sóttu Fylkismenn heim í Árbæinnn. Keflavík hefur gengið í gegnum miklar breytingar á leikmannahópnum frá síðast tímabili þegar Keflavík endaði í sjöunda sæti deildarinnar svo liðið er svolítið óskrifað blað fyrir tímabilið í ár. Spekingar Fótbolta.net spá Keflvíkingum tíunda sæti Bestu deildarinnar en nýliðum Fylkis því ellefta.

Leikurinn var hinn fjörugasti og bæði lið fengu nokkur álitleg færi sem fóru forgörðum. Heimamenn voru sterkari aðilinn í fyrri hálfleik og komust yfir á 30. mínútu með marki úr víti eftir að Frans Elvarsson braut á leikmanni Fylkis í teignum. Staðan 1:0 í hálfleik.

Keflvíkingar unnu sig jafnt og þétt inn í leikinn í seinni hálfleik og náðu fljótlega undirtökunum. Á 74. mínútu jafnaði Sami Kamel leikinn eftir stoðsendingu frá Degi Inga Valssyni en Kamel er nýr leikmaður hjá Keflavík.

Dagur Ingi var svo aftur á ferðinni í uppbótartíma þegar Keflavík átti skot á marki, það er varið en Dagur Ingi náði frákastinu og setti boltann í netið (92’). 2:1 fyrir Keflavík því lokatölur og Keflvíkingar byrja tímabilið á sigri.