Karen hugsar jákvætt
- Á jafnmikla möguleika og hinar
Um síðustu helgi lauk öðru mótinu á Eimskipsmótaröðinni í golfi en mótið fór fram í Vestmannaeyjum. Hin 21 árs Karen Guðnadóttir úr Golfklúbbi Suðurnesja endaði í 3. sæti á mótinu eftir mikla baráttu um efsta sætið lengi vel. „Spilamennskan hjá mér var ekki góð framan af sumri, en svo þegar ég var búin að koma mér í spilaform varð skorið aftur eðlilegt,“ segir Karen sem hefur verið dugleg að mæta á æfingar hjá þjálfara í vetur.
Áður en hún hélt í mótið í Eyjum undirbjó hún sig með sérstökum hugaræfingum og jákvæðum hugsunum. „Mér gekk frekar illa í mótinu á Akranesi á dögunum og ég ákvað að bæta mig og lækka mig í forgjöf. Mér gekk vel í æfingahringnum í Eyjum og var með mjög jákvætt hugarfar fyrir mótið. Mér tókst mjög vel í mótinu að halda mínu striki þótt inn á milli hafi komið upp klaufaleg mistök,“ sagði Karen í samtali við Víkurfréttir.
Þarf að öðlast meiri reynslu
„Þrátt fyrir að hafa verið í baráttunni tókst mér að hugsa lítið sem ekkert um það og þannig náði ég mest allan tímann að vera stöðug á lokahringnum. Ég gerði klaufaleg mistök á síðustu holunni því þá vantaði greinilega einhverja reynslu því ég var orðin of spennt fyrir því að sjá hvernig þetta myndi enda, í stað þess að halda áfram að hugsa bara um mitt og leyfa mótinu að klárast í rólegheitum.“
Hún segir að gaman hafi verið að spila í lokaholli á mótaröðinni en þetta er aðeins í annað skipti sem Karen kemst þangað. „Ég er með meiri reynslu núna og finn að ég á alveg jafn mikla möguleika í baráttunni og hinar,“ segir Karen en hún er spennt fyrir komandi golfsumri.
„Ég er spennt fyrir framhaldinu og þegar mér tekst að ná almennilegum tökum á hugarfarinu í spilamennskunni þá næ ég að spila á því skori ég sem vil ná. Ég held áfram að æfa mig að hugsa um núið í spilamennskunni. Það eru mörg smáatriði sem ég ætla að ná að púsla saman, spurningin er bara hversu langan tíma það tekur fyrir mig að ná því,“ sagði Karen að lokum.
