Jafnt í Kaplakrika

Keflavík og FH skildu jöfn að skiptum, 1-1, í leik liðanna í þriðju umferð Landsbankadeildarinnar.
Leikurinn fór fram í Kaplakrika og var ansi skemmtilegur og létu áhorfendur og leikmenn stöku skúri ekki á sig fá. Keflvíkingar fjölmenntu í Hafnarfjörð til að styðja sína menn og létu vel í sér heyra.

FH mætti til leiks án Heimis Guðjónssonar, sem hefur verið potturinn og pannan í sóknarleik liðsins og var þar sannarlega skarð fyrir skildi.
Keflvíkingar náðu forystunni á 32. mínútu þegar varnarjaxlinn Sreten Djurovic skoraði með skalla eftir aukaspyrnu frá Scott Ramsey.
Keflvíkingar virtust hafa tök á leiknum en á 67. mín jafnaði Ásgeir Gunnar Ásgeirsson leikinn með glæsilegu skoti sem fór í stöngina og inn.

Þórarinn Kristjánsson var nálægt því að koma Keflvíkingum yfir þegar tíu mínútur voru til leiksloka, en skot hans smaug framhjá stönginni. FH-ingar luku leiknum einum manni færri eftir að leikmanni þeirra var vísað af velli eftir tvö gul spjöld.

Milan Stefán Jankovic, þjálfari Keflavíkur, sagðist nokkuð sáttur við stigið enda eru þeir enn í efsta sæti deildarinnar. „Við fórum auðvitað í laikinn til að sigra, en það er ekki slæmt að fá eitt stig út úr leik gegn FH. Við erum í góðum málum þessa stundina þar sem við erum enn á toppnum og ungu strákarnir hjá okkur eru fullir sjálfstrausts. Við höfum staðið okkur vel og ég vona að það haldi áfram!“