Ísland vann Belgíu í Hólminum

Körfuknattleikslandslið Íslands vann nauman sigur á Belgíu í vináttulandsleik í í dag, 77-76. Grindvíkingurinn Páll Axel Vilbergsson skoraði sigurkörfuna í þann mund sem leiktíminn rann út.

Leikurinn, sem fór fram í Stykkishólmi, var jafn en Belgar héldu naumri forystu lengst af. Staðan í hálfleik var 42-50 og fyrir síðasta leikhluta leiddu gestirnir 59-63. Íslendingar reyndust þó sterkari á lokasprettinum og unnu að lokum góðan sigur.

Hlynur Bæringsson fór á kostum í liði Íslands og skoraði 23 stig og tók 14 fráköst. Páll Axel skoraði 16 og Jakob Sigurðarson skoraði 11.

Liðin léku þrjá leiki og unnu Belgarnir fyrstu tvo.