Ísland berst um 3. sætið í kvöld

Íslenska karlalandsliðið í körfuknattleik mætir Austurríkismönnum í síðasta leik sínum í B-deild Evrópukeppninnar. Leikurinn er hreinn úrslitaleikur um 3. sætið í riðlinum og ljóst að bæði lið munu leika áfram í B-deild Evrópukeppninnar á næstu árum.

Íslenska liðið hefur átt góðu gengi að fagna í sumar. Liðið hafði sigur á Smáþjóðaleikunum í Mónakó og lögðu Georgíumenn á dögunum. Með sigri í kvöld getur liðið farið í frí eftir sumarið með sigurhlutfallið 8-1.

Ísland mátti sætta sig við nokkuð stóran ósigur í leiknum ytra gegn Austurríki. Lokatölur í þeim leik voru 85-64 Austurríki í vil þar sem sauð upp úr á lokamínútum leiksins og heimamenn röðuðu inn stigum af vítalínunni.

Brenton Birmingham gat ekki verið með íslenska landsliðinu í sigurleiknum gegn Lúxemburg um síðustu helgi en hann er nú aftur kominn inn í hópinn. Sveinbjörn Claessen, ÍR, sem tók sæti Brentons í Lúxemburg er því aftur kominn út úr hópnum.

Hópurinn er skipaður eftirfarandi leikmönnum:

Magnús Gunnarsson

Friðrik Stefánsson

Fannar Ólafsson

Helgi Magnússon

Logi Gunnarsson

Sigurður Þorsteinsson

Kristinn Jónasson

Þorleifur Ólafsson

Jakob Örn Sigurðarson

Páll Axel Vilbergsson

Brenton Birmingham