Hvítar flatir á Kálfatjarnarvelli
Lóan er komin til Íslands. Hún sást á Hornafirði í fyrsta sinn á þessu ári sl.. sunnudag. Hún er hinn eini sanni vorboði og mun með sínu ljúfa dirrrinndíi ylja landsmönnum næstu mánuðina. Þegar lóan er komin fer að styttast í að golfvellir landsins taki á sig græna mynd. Þá kætast kylfingar og flykkjast út á völl.
Í morgun var frekar kuldalegt um að litast á Kálfatjarnarvelli í Vogum á Vatnsleysuströnd. Græni liturinn var aðeins farinn að láta sjá sig, en flatirnar voru fannhvítar í morgun þegar þessi mynd var tekin.
Búast má við að hvíti liturinn víki fyrir þeim græna þegar líður á daginn þar sem hiti fer hækkandi og sól skín í heiði á sunnanverðu landinu.
Myndirnar tók Húbert Ágústsson vallarstjóri á Kálfatjarnarvelli í morgun.
