Hörður Axel tekur út leikbann í fyrsta leik úrslitakeppninnar

Fyrirliði og leikstjórnandi körfuknattleiksliðs Keflavíkur, Hörður Axel Vilhjálmsson, hefur verið úrskurðaður í bann þegar Keflavík mætir Tindastóli í fyrstu umferð úrslitakeppni Subway-deildar karla eftir að hafa verið rekinn úr húsi eftir leik Keflavíkur og Njarðvíkur í lokaumferð deildarkeppninnar. Gríðarleg blóðtaka fyrir Keflvíkinga sem höfðu verið án Harðar í síðustu leikjum vegna meiðsla.

Það varð uppi fótur og fit í loka leiks Keflavíkur og Njarðvíkur þar sem allt var í járnum og staðan jöfn (79:79) þegar örfáar sekúndur voru til leiksloka. Keflavík tapar boltanum og Njarðvík fer í sóknina. Þar er Dedrick Basille með boltann, hann fer fram hjá Herði Axel sem virðist brjóta á honum en ekkert er dæmt. Basile sendir á Nacho Martin sem setur niður þrist og tryggir sigurinn.

Eftir leik er Hörður Axel að eiga orðaskipti við Jakob Árna Ísleifsson, einn dómaranna, þegar annar dómari, Davíð Tómas Tómasson, kemur aðvífandi og vísar Herði Axel beint út úr húsi. Hér á eftir má sjá samskipti dómaranna og Harðar að leik loknum:

Hér að neðan má sjá og heyra umfjöllun um atvikið í Körfuboltakvöldi Stöðvar tvö.