Hilmar Geir hættur hjá Keflavík

Knattspyrnumaðurinn Hilmar Geir Eiðsson hefur sagt skilið við Keflvík í Pepsi-deild karla en hann hefur ákveðið að leita fyrir sér á höfuðborgarsvæðinu fyrir næsta tímabil. Hilmar hefur leikið með Keflvíkingum síðustu tvö ár en hann kom frá Haukum.  Hann hefur leikið 40 deildarleiki og skorað í þeim sex mörk.

Frá þessu er greint á heimsíðu Keflvíkinga en þar kveður Hilmar sjálfur félagið.

„Ég vill þakka stuðningsmönnum, þjálfurum og því frábæra fólki sem starfar í kringum liðið fyrir tvö skemmtileg og jafnframt lærdómsrík ár. Það hefur verið ómetanlegt að taka þátt í uppbyggingunni á Reykjanesinu sem eini fulltrúi þeirra sem telst á „besta“ aldri. Auk þess vill ég sérstaklega þakka leikmönnunum liðsins sem hafa margir orðið góðir félagar og vinir,“ segir Hilmar.

„Af persónulegum ástæðum hef ég ákveðið að endurnýja ekki samning minn við Keflavík og er stefnan að leika á höfuðborgarsvæðinu næsta tímabil. Framtíðin er björt hjá liðinu og mega stuðningsmenn og ég þar á meðal eiga von á spennandi tímum framundan.“