Guðmundur Rúnar og Karen meistarar hjá GS

Guðmundur Rúnar Hallgrímsson vann öruggan sigur á meistaramóti Golfklúbbs Suðurnesja sem lauk nú fyrir stuttu. Guðmundur gerði sér lítið fyrir og jafnaði vallarmetið á 4 hringjum sem Örn Ævar á og endaði á 11 höggum undir pari. Örn Ævar Hjartarson sem sigrað hefur tíu sinnum varð annar og mátti sín lítils gegn snilldartöktum Guðmundar á lokahringnum. Karen Guðnadóttir sigraði í kvennaflokki.
Það var nett spenna í loftinu fyrir lokahringinn í meistaraflokki karla. Ætlaði Örn Ævar sem kom inn á besta skorinu í gær að vinna upp tveggja högga forskot Guðmundar og jafna þannig met Þorbjörn Kjærbo sem hefur tíu sinnum orðið klúbbmeistari Golfklúbbs Suðurnesja. Víkurfréttavefurinn sagði í morgun að Guðmundur Rúnar hefði einu sinni orðið meistari. Hann leiðrétti það rétt fyrir hringinn í dag við ritstjórann. „Þetta er í lagi, þú getur þá sagt í kvöld að ég verði orðinn þrefaldur meistari,“ sagði hann í léttum tón en einn titil vantaði upp á hjá Guðmundi sem vann tvö ár í röð, 2005-06.. Ritstjórinn tók hann á orðinu og nú hefur þessi leiðrétting komið fram og þeir sem þetta lesa vita nú að Guðmundur Rúnar sem lék eins og alvöru skoskir kylfingar gerðu í gamla daga, þ.e.a.s. í „kvartbuxum“, hefur nú unnið titilinn í þrígang.
Eftir fjórar holur var Guðmundur tvo undir pari og Örn einn undir, báðir léku þeir frábært golf og Örn fékk tvö högg í víti á fyrstu holu fyrir að slá út fyrir völlinn en var samt á þessu skori. En hann gerði afdrifarík mistök á 5. flöt þegar hann púttaði fjórum sinnum og tapaði tveimur höggum. Fyrir þá holu munaði 3 höggum á þeim en eftir það fimm höggum og það var of mikið fyrir Örninn að brúa. Hann náði að minnka muninn í 3 högg á 16. braut en nær komst hann ekki og Guðmundur fékk fugl á 17. braut eftir frábært innáhögg og þá var þetta búið. Hann kórónaði sigurinn með glæsilegum fugli á síðustu brautinni og endaði hringina fjóra eins og fyrr segir á 11 höggum undir pari. Atli Elíasson sem var í þriðja sæti fyrir lokahringinn missti það í hendur Davíðs Jónssonar sem endaði á 2 undir í heildina. Mjög gott skor var hjá efstu mönnum en fjórir efstu voru undir 290 höggum og það hefur ekki gerst áður.

Karen Guðnadóttir vann öruggan sigur í kvennaflokki og Jón Jóhannsson vann í fyrsta flokki karla þar sem margir ungir kylfingar bættu forgjöf sína mikið með góðu golfi í vikunni.

Meistaraflokkur karla
1. Guðmundur Rúnar Hallgrímsson   69-68-72-68 (277)
2. Örn Ævar Hjartarson                      72-72-67-71 (282)
3. Davíð Jónsson                               70-73-73-70 (286)
4. Atli Elíasson                                   70-72-72-75 (289)

Meistaraflokkur kvenna
1. Karen Guðnadóttir                    322
2. Heiður Björk Friðbjörnsdóttir   355

1.   flokkur karla
1. Jón Jóhannsson              301
2. Guðni Friðrik Oddsson   306
3. Hafliði Már Brynjarsson   307

2.   flokkur karla
1. Björn Einarsson               326
2. Kristján Árni Jakobsson   330
3. Jón Gunnarsson               333

3.   flokkur karla
1. Arnar Þór Smárason   349
2. Bjarni H. Lúðvíksson   353
3. Andri Þór Skúlason      357

4. flokkur karla
1. Freyr Guðmundsson   376
2. Freyr Bjarnason           382
3. Gissur H. Þórðarson   384

5. flokkur karla
1. Einar B. Bjarkason         396
2. Ragnar G. Albertsson   417
3. Róbert M. Vilhjálmsson 427

1. flokkur kvenna
1. Erla Þorsteinsdóttir   239
2. Helga Sveinsdóttir   271
3. Elín Gunnarsdóttir   279

2. flokkkur kvenna
1. Guðný Sigurðardóttir   286
2. Hulda B. Birgisdóttir   300
3. Íris Dögg Steinsdóttir   301

3. flokkur kvenna
1. Ásta P. Hartmannsdóttir   455
2. Karitas Sigurvinsdóttir       497

Kvennaflokkur 65 ára og eldri
1. Gerða Halldórsdóttir        318
2. Hulda Guðmundsdóttir   329
3. Sigríður Guðbjörnsdóttir 354

Karlar 70 ára og eldri
1. Guðmundur R. Hallgrímsson       270
2. Sigurður Friðriksson   275
3. Jónas Þórarinsson   298

Karlar 55-69 ára
1. Þorsteinn Geirharðsson   227
2. Júlíus Jón Jónsson           241
3. Elías Kristjánsson             242

Drengir 14-15 ára
1. Grétar Helgason         358
2. Unnar G. Einarsson   383
3. Unnar Þór Benediktsson   396

Drengir 13 ára og yngri
1. Björgvin V. Færseth        166
2. Samúel K. Friðjónsson   188
3. Jóhannes S. Ásgeirsson 199

Mikil veðurblíða var alla meistaramótsvikuna, svo mikil að menn muna ekki annað eins í sögu GS.
Sigurvegar verða krýndir í lokahófi mótsins í golfskálanum í Leiru í kvöld þar sem allir eru velkomnir.

Guðmundur Rúnar fagnar sigri eftir glæsilegt golf, 11 högg undir pari á 72 holum. Örn Ævar sem varð annar, klappar fyrir félaga sínum.

Karen Guðnadóttir varð klúbbmeistari kvenna.

Jón Jóhannsson vann sigur í 1. flokki karla eftir mjög gott golf en hann lék á einu undir pari í dag.

Sigurður Jónsson, mótsstjóri og meistaraflokkskylfingur var flottur í tauinu í dag eins og reyndar Guðmundur Rúnar eins og sjá má á efstu mynd en þar er hann að slá á 5. teig.