Grindvíkingar stálu sigrinum í uppbótartíma

Grindvíkingar mættu Víkingum í gærkvöldi í Pepsí deild karla. Þetta var annar leikur Grindvíkinga í deildinni í sumar. Leikurinn fór rólega af stað og voru Víkingar betri aðilinn í fyrri hálfleik. Fyrsta markið kom á 25 mínútu og var það Geoffrey Castillion sem skoraði það fyrir Víkinga. Fleiri mörk litu ekki dagsins ljós í fyrri hálfleik. Kristij­an Jajalo markvörður Grinda­vík­ur stóð sig frábærlega milli stanganna og sá til þess að boltinn fór ekki oftar yfir marklínuna. 

Víkingar byrjuðu seinni hálfleik af krafti en náðu ekki að skapa sér afgerandi færi. Það ar svo á 67 mínútu sem Grindvíkingar ná að jafna eftir skyndisókn. Það var Alexand­er Veig­ar sem náði að pota bolt­an­um yfir marklín­una. Það var svo í uppbótartíma sem Andri Rún­ar Bjarna­son skoraði sig­ur­markið fyrir Grindvíkinga. Lokaniðurstaðan var því 1:2 fyrir Grindvíkinga. Þeir eru því komnir með 4 stig eftir tvo fyrstu leikina.

Ljósmynd: Fótbolti.net