Grindavík upp fyrir Þór eftir sjöunda sigurinn í röð

Grindvíkingar unnu sjöunda sigur sinn í röð þegar þeir lögðu Þór í Þorlákshöfn í gær og með sigrinum höfðu liðin sætaskipti. Grindavík var eina Suðurnesjaliðið sem lék í gær í Subway-deild karla í körfuknattleik en bæði Keflavík og Njarðvík áttu heimaleiki sem þurfti að fresta vegna aðstæðna í Reykjanesbæ eftir að hitaveitulögn fór í sundur við Svartsengi.

Þór Þ. - Grindavík 84:92

Grindvíkingar eru búnir að vera sjóðheitir að undanförnu og sýna að þeir ætla að gera tilkall til bikarsins í ár. Sigurinn í gær kom þeim í sama stigafjölda og Keflavík, Njarðvík og Þór en Keflavík og Njarðvík eiga bæði leik til góða. Grindavík fer upp fyrir Þór á töflunni vegna innbyrðis viðureigna.

Leikurinn var jafn og spennandi fyrstu þrjá leikhlutana, heimamenn hófu leikinn örlítið betur og voru með nokkurra stiga forskot lengst af en í upphafi fjórða leikhluta var allt jafnt (64:64).

Grindvíkingar sýndu styrkk sinn í byrjun leikhlutans og tóku öll völd á vellinum. Varnarleikur Grindvíkinga hélt Þórsurum niðri og Grindavík setti niður góð skot, staðan var orðin 72:83 þegar fjórar mínútur lifðu leiks.

Þetta ellefu stiga forskot voru Þórsarar aldrei að fara að vinna upp og Grindavík fór heim með enn einn sigurinn í farteskinu.