Grindavík í undanúrslit þrátt fyrir tap

Grindavíkurstúlkur eru komnar í undanúrslit í Hópbílabikar kvenna þrátt fyrir tap, 60-62, í kaflaskiptum leik gegn Njarðvík í gær. Grindavík vann fyrri leik liðanna með 4 stiga mun.

Ungt og lítt reynt lið Njarðvíkur hefur komið á óvart í undanförnum leikjum og sýndi það í gær að þær geta sannarlega staðið í sterkari liðum deildarinnar.

Grindavík, sem spilaði á heimavelli, byrjaði mun betur og var komið með 9 stiga forskot, 24-15 eftir fyrsta leikhluta, en þá hrukku gestirnir frá Njarðvík í gang. Þær skelltu í lás í vörninni og voru komnar með eins stigs forskot í hálfleik, 33-34.

Í þriðja fjórðungi snerist leikurinn aftur við og heimastúlkur náðu frumkvæðinu á nýjan leik. Þær leiddu með 8 stigum, 52-44, þegar haldið var í lokakaflann en þá varð enn einn viðsnúningurinn.

Grindvíkingar skoruðu aðeins 8 stig í síðasta fjórðungi og voru heppnar að halda tapinu í aðeins tveimur stigum.