Glæsilegur árangur á heimsmeistaramóti

Njarðvíkurmærin María Tinna Hauksdóttir og dansherra hennar Gylfi Már Hrafnsson höfnuðu í 7. sæti á heimsmeistaramótinu í ballroom dönsum um síðstu helgi. María og Gylfi keppa í aldursflokki 12-13 ára. Þau kepptu einnig í opinni Fred Astaire keppni og þar dönsuðu þau til úrslita með frábærum árangri og enduðu í 6. sæti en mjótt var á muninum í þessum úrslitum.

Unnið allar keppnir á Íslandi

Þau hafa átt einstaklega gott ár því þau hafa unnið allar keppnir á Íslandi árið 2015 í sínum aldursflokki og eru því Íslandsmeistarar í ballroom, latin og 10 dönsum, Bikarmeistarar í ballroom og latin dönsum, Umsk meistarar í ballroom og latin dönsum og Lottó meistarar í ballroom og latin dönsum. Þau dönsuðu sig einnig til úrslita í Copenhagen open 2015 í febrúar og enduðu þar í 5. sæti í bæði ballroom og latin dönsum.