Gjorgi Manevski tryggði Grindvíkingum stig í sínum fyrsta leik

Nú í kvöld tóku Grindvíkingar á móti Stjörnunni í 12. umferð Pepsi deildar karla. Stjörnumenn komust yfir snemma leiks en það var nýr leikmaður Grindavíkur, Gjorgi Manevski, sem jafnaði metin rétt fyrir leikslok. Grindvíkingar eru komnir úr fallsæti og sitja í 10. sæti deildarinnar með 8 stig, jafn mörk og Selfyssingar í 11. sætinu en betra markahlutfall.
Grindvíkingar byrjuðu leikinn af krafti og tókst að koma boltanum í mark gestanna strax á fyrstu mínútu. Markið var þó dæmt af vegna rangstöðu og staðan því ennþá 0-0. Á 19. mínútu dró þó til tíðinda þegar Ellert Hreinsson kom gestunum yfir með góðu skoti. Staðan orðin 0-1. Eftir markið hresstust heimamenn til muna og áttu nokkrar hættulegar sóknir. Á 35. mínútu skoruðu Grindvíkingar annað mark en aftur var það dæmt af vegna rangstöðu. Það sem eftir lifði hálfleiks var jafnræði með liðunum og skiptust þau á að sækja. Annað mark leit þó ekki dagsins ljós og staðan því en 0-1 þegar liðin gengu til búningsherbergja.
Á 50. mínútu vildu heimamenn fá dæmda vítaspyrnu eftir að boltinn fór í höndina á Baldvini Sturlusyni en dómari leiksins virtist vera eini maðurinn á vellinum sá ekki atvikið og lét leikinn því halda áfram. Á 71. mínútu áttu Grindvíkingar að fá annað víti þegar Tryggvi Steinn Bjarnason dró Gilles Ondo niður innan teigs en eins og á 50. mínútu dæmdi dómarinn ekkert þrátt fyrir að vera í ágætri stöðu til að sjá brotið. Gjorgi Manevski jafnaði síðan metin fyrir heimamenn á 89. mínútu en hann kom inná 15 mínútum fyrr og var hann að spila sinn fyrsta leik fyrir Grindavík. Á síðustu mínútum leiksins var allt á suðupunkti. Liðin skiptust á að eiga hvert dauðafærið á fætur öðru og ljóst að bæði lið ætluðu sér að vinna þennan leik. Þeim tókst þó ekki að koma boltanum yfir línuna og lokatölur í Grindavík því 1-1.

„Það var mikið batamerki á leik liðsins, við misstum ekki trúna og unnum í 90. mínútur þannig að þetta var mjög jákvætt,“ sagði Auðunn Helgason, leikmaður Grindavíkur, í leikslok. „Við ætluðum okkur að sækja þrjú stig, við færðum okkur framar á völlinn og þá opnaðist vörnin, en við erum bara í þannig stöðu að við verðum að taka sénsa og sækja þessi stig, það er alveg ljóst,“ bætti Auðunn við að lokum.