Friðrik Stefánsson Íþróttamaður Reykjanesbæjar 2006
Körfuknattleiksmaðurinn Friðrik Erlendur Stefánsson er Íþróttamaður Reykjanesbæjar árið 2006 en val á íþróttamanni ársins fór fram í Ljónagryfjunni í Njarðvík. Knattspyrnumaðurinn Guðjón Árni Antoníusson var annar í valinu og sundkonan Erla Dögg Haraldsdóttir var í þriðja sæti.
Íslandsmeistarar í íþróttafélögunum í Reykjanesbæ voru heiðraðir í dag og þá fékk sundþjálfarinn Eðvarð Þór Eðvarðsson að gjöf blómavönd og mynd af sér þegar hann varð Íþróttamaður Íslands árið 1986 eða fyrir nákvæmlega 20 árum síðan.
Víkurfréttir fengu hvatningarverðlaun ÍRB í ár fyrir yfirgripsmikla og jákvæða íþróttaumfjöllun. Páll Ketilsson, eigandi og ritstjóri Víkurfrétta, tók við verðlaununum
Eftirfarandi einstaklingar voru íþróttamenn hverrar deildar fyrir sig í Reykjanesbæ:
Guðjón Árni Antoníusson knattspyrnudeild
Friðrik Stefánsson körfuknattleikur
Elísa Sveinsdóttir fimleikadeild
Jóhann R. Kristjánsson íþróttir fatlaðra
Elva Björk Margeirsdóttir hestaíþróttir
Sævar Ingi Borgarsson lyftingar
Erla Dögg Haraldsdóttir sund
Karen Guðnadóttir badminton
Bjarni Sigurðsson skotíþróttir
Helgi Rafn Guðmundsson taekwondodeild
Örn Ævar Hjartarsson kylfingur Reykjanesbæjar
Gylfi Freyr Guðmundsson vélhjólaíþróttir
Um Friðrik Stefánsson eða „heimaklettinn“ eins og hann er oft nefndur:
Friðrik Erlendur Stefánsson er fyrirliði Íslandsmeistara UMFN 2006. Liðið vann einnig meistara meistaranna sl vetur. Síðastliðið tímabil var án efa besta tímabil Friðriks enda hlaut hann viðurkenningu sem Besti leikmaður Íslandsmótsins 2006, og var valinn í fimm manna úrvalslið mótsins.
Friðrik skilaði 17 stigum að meðaltali og tók um 11 fráköst. Í úrslitakeppni leiddi hann lið sitt til sigurs í Íslandsmóti en hann gerði 14 stig og tók 10 fráköst að meðaltali í úrslitakeppninni. Friðrik er einnig annálaður sem einn besti varnarmaður deildarinnar og lék stórt hlutverk sem slíkur í meistaraliði. Friðrik var einnig valinn Besti leikmaður UMFN fyrir tímabilið og hann er fastamaður í íslenska landsliðinu og hefur verið einn jafnbesti maður liðsins síðustu árin.
Það sem af er þessum vetri hefur Friðrik leikið mjög vel og jafnvel betur en síðasta tímabil. UMFN tók þátt í Evrópukeppninni í haust og þar var hann jafnbesti maður liðsins, skoraði rúm 18 stig á leik, tók rúm 10 fráköst, auk þess að skjóta 67% úr skotum af velli og 75% af vítalínunni.
VF-mynd/ [email protected]
Hægt er að nálgast fleiri myndir frá valinu á Íþróttamanni Reykjanesbæjar hér í Ljósmyndasafninu á vf.is.
