Frábær frammistaða íslenska U-16 landsliðsins

U-16 ára stúlknalandslið Íslands í körfuknattleik lenti í öðru sæti í B-deild Evrópukeppninnar eftir sigur á Svíum í dag, 66-63.

Íslenska liðið, sem er skipað fjölmörgum stúlkum frá Suðurnesjum, vann sjö leiki og tapaði aðeins einum, gegn toppliði Litháen.

Árangurinn er með eindæmum góður og hafa stúlkurnar vakið verðskuldaða athygli í Eistlandi, þar sem mótið fer fram, með frábærri frammistöðu. Stúlkurnar eru vanar velgengni því þær urðu Norðurlandameistarar á dögunum.

Leikurinn í dag var í raun úrslitaleikur um annað sætið því að með sigri hefðu Svíar skákað íslensku stelpunum. Hann var jafn og spennandi þar sem liðin voru jöfn að stigum í hálfleik. Í þriðja leikhluta náðu „Stelpurnar okkar“ þriggja stiga forystu sem Svíarnir náðu ekki að vinna upp og var íslenskur sigur því staðreynd.

Árangurinn er glæsilegur og sýnir enn og aftur fram á hversu gríðarlega öflugt unglingastarfið er hér á landi. Vonandi verður þetta hvatning fyrir stúlkurnar að gera enn betur næst og augljóst er að framtíð körfuboltans hér á landi er afar björt.
Hér má sjá tölfræði leiksins í dag