Enn tapar Grindavík

Grindvíkingum gengur ekkert að komast í gang eftir HM-hlé í Pepsi-deild karla á Íslandsmótinu í knattspyrnu. Þeir tóku á móti KA-mönnum í Grindavík í kvöld og biðu lægri hlut.

 

Grindvíkingar byrjuðu betur og skoruðu stax á áttundu mínútu en þar var að verki Alexander Veigar Þórarinsson.

 

Ásgeir Sigurgeirsson jafnaði fyrir KA á 31. mínútu og þannig var staðan í hálfleik.

 

Um miðjan síðari hálfleik fékk Marinó Axel Helgason sitt annað gula spjald og þar með rautt. Grindvíkingar voru því einum færri til leiksloka.

 

KA menn skoruðu sitt annað mark í uppbótartíma og þar var að verki Ýmir Már Geirsson.

 

Talsvert af spjöldum var á lofti í Grindavík. Fjögur gul á Grindvíkinga og þrjú á KA.

 

Grindvíkingar eru enn í 5. sæti deildarinnar með 17. stig en hafa tapað fjórum af fimm síðustu leikjum sínum.

 

Keflvíkingar, sem verma botninn með 3 stig, eiga leik á morgun á Víkingsvelli kl. 18:30 þegar þeir sækja Víkinga heim. Víkingur er í 7. sæti deildarinnar með 15 stig.