Elvar og Gunnar á leið í háskólaboltann í Bandaríkjunum
Fullur námsstyrkur í boði
Elvar Már Friðriksson leikstjórnandi Njarðvíkinga og Gunnar Ólafsson bakvörður Keflvíkinga, eru hugsanlega á leið í háskólaboltann í Bandaríkjunum. Þeir héldu á dögunum til New York þar sem St. Francis háskóli var heimsóttur. Samkvæmt fregnum Karfan.is þá var þeim báðum boðinn fullur skólastyrkur þar á næsta ári.
Karfan greinir einnig frá því að Elvar hafi undir höndum tilboð frá þremur öðrum skólum.
„Ég þarf bara að gera upp hug minn í þessum efnum og hef svo sem alveg tíma til þess,“ sagði Elvar í viðtali við vefsíðuna.
Báðir hafa leikmennirnir verið að vekja athygli hér heima. Þá sérstaklega Elvar sem hefur stimplað sig inn sem einn af allra bestu leikmönnum deildarinnar.
Gunnar skoraði magnaða sigurkörfu gegn Njarðvíkingum á dögunum.
