Ellismellur á undanþágu og ætlar alla leið

 

Á laugardag er reiknað með níu úrslitabardögum en nánar verður hægt að lesa um undankeppnina á vf.is þegar það ræðst hvaða boxarar munu mætast í hringnum um Íslandsmeistaratitlana í lokakeppninni í Reykjanesbæ á laugardag.

 

Vikar er 35 ára gamall og keppir í léttþungavigt á Íslandsmótinu og mun þar mæta bardagmönnum sem verða um 10 árum yngri en hann. Vikar fékk undanþágu til að vera með á Íslandsmótinu en samkvæmt hnefaleikastöðlum er hann kominn í ,,old boys” flokk og kveðst ekki sáttur við það.

 

,,Ég er ekki búinn að boxa mikið en er samt í toppformi. Ég byrjaði síðasta miðvikudag og tók þá eina boxæfingu en það er eitt að vera í góðu formi og annað að vera með góða tímasetningu í íþróttinni. Maður þarf að boxa tímasetninguna í sig,” sagði Vikar sem ætlar sér mikla hluti um helgina.

 

,,Ég ætla mér að taka titilinn. Ég er 35 ára og í stórmótum og á Ólympíuleikum er 34 ára hámarkið og eftir það detta menn yfir í ,,old boys” og ég er ekki alveg sáttur við það. Ég finn það bara að það er langur vegur í gamlingjaflokkinn hjá mér,” sagði Vikar hress í bragði. Þrátt fyrir að vera aðeins 35 ára er Vikar ellismellur í íþróttinni með undanþágu sem hann ætlar að nýta til hins ítrasta en vegurinn á lokakvöldið er langur þar sem fimm einstaklingar eru í flokknum svo undankeppnin verður strembin.

 

Vikar bætti því einnig við að það væri eins gott að hann hefði fengið undanþágu inn í mótið því annars hefði aðsóknin orðið lítil sem engin. Stutt í gamanið hjá einum reynslumesta boxara landsins.

 

Það verður því hnefaleikaveisla um helgina sem enginn ætti að láta fram hjá sér fara og hægt verður að fylgjast með gangi mála á vf.is