Eldri borgarar rökuðu inn verðlaunum

Eldri borgarar frá Reykjanesbæ tóku þátt í landsmóti UMFÍ á Sauðarkróki  sem haldið var síðustu helgi. Félagsskapur sem heitir Félag áhugafólks um íþróttir aldraðra stóð fyrir því að eldri ungmennafélagar tækju þátt í landsmótinu, og er þetta í fyrsta skipti sem þetta er gert. Um 200 eldri ungmennafélagar tóku þátt víðs vegar að af landinu.

Hópurinn frá Reykjanesbæ var afar sigursæll, sópaði að sér verðlaunum. Gull, silfur og brons í Pútti og gull og silfur í Boccia.

Einnig tók hópurinn þátt í glæsilegri leikfimisýningu þar sem 130 manns sýndu leikfimidansa, og línudansarar voru einnig með sýningaratriði. Allir stóðu sig með mikilli prýði og voru bænum sínum til sóma í alla staði. Eldri ungmennafélagar í Reykjanesbæ vilja koma á framfæri þakklæti til þeirra sem styrktu þessa fyrstu þátttöku þeirra í Landsmóti UMFÍ.