Davíð Hildiberg kjörinn sundmaður ársins

Davíð Hildiberg Aðalsteinsson hefur verið kjörinn sundmaður ársins af Sundsambandi Íslands. Davíð stundaði nám í Arizona State háskólanum í Bandaríkjunum, en hann útskrifaðist í fyrra sumar og fjallaði lokaritgerð hans meðal annars um fjölnota sundaðstöður. Frá því að Davíð kom aftur heim hefur hann æft með ÍRB í Reykjanesbæ en hann hefur lengi verið með bestu baksundsmönnum landsins.

Þetta er sagt um Davíð við val hans sem sundmann ársins hjá Sundsambandi Íslands:
„Davíð Hildiberg stóð sig best allra íslenskra karla í sundi á árinu 2017. Fyrst ber að telja gullið á Norðurlandameistaramótinu hér í Reykjavík í byrjun desember en hann sigraði 100m baksund. Þá komst hann í úrslit í 50m baksundi á sama móti og endaði fjórði. Davíð vann svo til tveggja bronsverðlauna í einstaklingssundum á Smáþjóðaleikunum í San Marino í sumar. Hann var í landssveit Íslands í boðsundi sem setti tvö landsmet á mótinu og unnu til tveggja silfurverðlauna. Davíð þykir kurteis og rólegur í öllum samskiptum og hvetjandi og styðjandi við fólkið í kringum sig. Hann er frábær fyrirmynd yngra sundfólks og alltaf verið metnaðarfullur í því sem hann tekur sér fyrir hendur. Hann er jákvæður og hefur stundað íþróttina af miklum þrótt síðastliðin ár. Hann er því vel að þessari viðurkenningu kominn.“