Bradford á leiðinni til Njarðvíkur

Njarðvíkingar hefur gert munnlegt samkomulag við bandaríska leikmanninn Nick Bradford um að leika með liðinu út þetta tímabil í Iceland Express deildinni í körfubolta. Þetta kom fram á vefsíðunni karfan.is í morgun.

Sigurður Ingimundarson þjálfari Njarðvíkinga sagði í samtali við Karfan.is að hinsvegar væri ekkert komið á hreint fyrr en að blek er komið á pappírinn og leikmaðurinn kominn til landsins. „Reynslan hefur kennt mér að staðfesta ekki neitt fyrr en að búið að er að ganga frá öllum lausum endum. En ef allt gengur upp þá er þetta vissulega góður fengur. Nick er þekkt stærð, hann þekkir vel til á Íslandi og veit vissulega til hvers er ætlast af honum.“

Nick Bradford hefur áður gert garðinn frægan hér á landi, nú síðast í vor þegar hann var nálægt því að landa Íslandsmeistaratitli með Grindvíkingum en hann vann titla með Keflavík fyrir nokkrum árum. Bradford samdi svo við finnskt lið fyrir þessa leiktíð, en var látinn fara frá liðinu um áramótin.

Það þarf ekki að hafa mörg orð um liðsstyrkinn sem þeir grænu fá með Nick Bradford og það er ljóst að Keflvíkingar, sem voru að fá nýjan leikmann, hefðu reynt að klófesta hann, hefðu þeir ekki verið búnir að fá annan.

Njarðvíkingar eru í toppbaráttunni með 18 stig í öðru sæti deildarinnar, jafn mörg stig og Stjarnan og KR sem eru í fyrsta og þriðja sæti úrvalsdeildarinnar. Þeir hafa komið einna mest á óvart í deildinni í vetur, kanalausir hafa þeir vermt toppsætið í langan tíma. Þeir verða örugglega ekki árennilegir með Bradford innanborðs. Það verður spennandi að fylgjast með körfunni á næstunni því deildin er hálfnuð og nú hefst seinni hálfleikur og úrslitakeppnin hefst í mars.