Björn Axel aftur í Njarðvík
Markahæsti leikmaður liðsins frá síðustu leiktíð snýr aftur
Njarðvíkingar fengu í dag góðan liðsstyrk þegar Björn Axel Guðjónsson gekk til til liðs við þá grænklæddu eftir að hafa leikið með uppeldisfélagi sínu, Gróttu, það sem af er sumri.
Björn Axel varð markahæstur Njarðvíkinga á síðasta leiktímabili en kemur aðeins til með að stoppa stutt í Njarðvík þar sem að hann hyggst fara vestur til Bandaríkjanna í nám í lok mánaðar og mun því að öllum líkindum aðeins leika þrjá leiki með liðinu.
Mikil markaþurrð hefur verið í Njarðvík síðustu vikurnar og vonast Njarðvíkingar eftir því að stutt stopp Björns hjálpi liðinu að finna marknetið.
Njarðvíkingar mæta Hetti á laugardaginn á Njarðtaksvellinum kl. 14.
