Birgitta Haukdal skemmtir fyrir leik Keflavíkur og Grindavíkur á morgun

Keflavík og Grindavík mætast öðru sinni í úrslitaeinvígi liðanna í Intersport-deild karla í körfuknattleik á morgun og hefst leikurinn kl. 19:15. Körfuknattleiksdeild Keflavíkur hefur fengið Birgittu Haukdal til lið við sig og mun hún halda tónleika í íþróttahúsinu við Sunnubraut fyrir leikinn. Húsið opnar kl. 18:00 og munu tónleikar Birgittu hefjast kl. 18:30 og standa yfir í um 20 mínútur. Birgitta mun, ásamt félögum sínum, flytja nokkur vinsæl lög fyrir leikinn og síðan líklega eitt eða tvö til viðbótar í hálfleik. Miðaverð á leikinn verður óbreytt, það er að segja 800 kr. fyrir fullorðna, 16 ára og eldri, en 400 kr. fyrir börn á grunnskólaaldri. Má búast við troðfullu húsi þar sem Birgitta er án efa heitasta stjarnan í íslensku tónlistarlífi í dag og er fólki því bent á að mæta snemma til að ná góðum sætum. Auk Birgittu verður ýmislegt annað gert til skemmtunar t.d. munu stúlkur frá Fimleikadeild Keflavíkur taka þátt í fjörinu.

Það verður því ekki bara körfuboltafjör eins og það gerist best á Íslandi heldur einnig frábær tónlistarveisla og óhætt að segja að Keflvíkingar séu með þessu að gera frábæra úrslitakeppni enn betri.