Bikarslagur í kvöld: Keflavík – FH

Keflavík tekur á móti Íslandsmeisturum FH í 16 liða úrslitum VISA-bikars karla í kvöld. Leikið verður á Njarðtaksvellinum í Njarðvík og hefst leikurinn kl. 19:15. Svo skemmtilega vill til að þetta er þriðja árið í röð sem þessi lið mætast í bikarnum á heimavelli Keflvíkinga.

Keflvíkingum hefur gengið vel í þessum leikjum og slegið FH-inga út úr bikarnum tvö síðustu ár. Í fyrra tryggði Magnús Þorsteinsson sigurinn í 8 liða úrslitum með eina marki leiksins. Það má því búast við kemmtilegum leik eins og alltaf þegar þessi lið mætast.

Keflavík og FH hafa átta sinnum mæst í bikarkeppninni. Liðin mættust fyrst í undanúrslitum árið 1972 og gerðu þá markalaust jafntefli. Á þessum árum var leikinn annar leikur eftir jafntefli og FH-ingar unnu seinni leikinn óvænt en þeir léku þá í 2. deild. Síðan hefur Keflavík fimm sinnum haft betur gegn FH í bikarnum en FH-ingar tvisvar. Síðast unnu FH-ingar í eftirminnilegum leik árið 2001 en hann endaði í vítaspyrnukeppni þar sem Gunnaleifur Gunnleifsson misnotaði síðustu spyrnuna. Gunnleifur lék þá í marki Keflavíkur en leikur nú með FH. Síðustu tvö ár hefur Keflavík svo slegið FH út með heimasigrum.

Willum Þór Þórsson, þjálfari Keflavíkur, er bjartsy´nn á sigur gegn Íslandsmeisturunum.
„Það er skemmtilegt að fá stóran leik á miðju keppnistímabili og við erum í þessu fyrir stóru stundirnar. FH eru Íslandsmeistarar og það er gaman að mæta þeim í alvöruleik. Við höfum heimavöllinn og það hjálpar okkur vonandi,“ segir Willum Þór sem hefur litlar
áhyggjur þrátt fyrir að gengi liðsins hafi dalað örlítið eftir frábæra byrjun á Íslandsmótinu.
---