Arnór orðaður við Swansea
Ensk lið sýna miðjumanninum áhuga
Sífellt fleiri knattspyrnulið virðast óska eftir starfskröftum miðjumannsins Arnórs Ingva Traustasonar. Nú síðast er verið að orða Arnór við enska úrvalsdeildarliðið Swansea en þar leikur Gylfi Sigurðsson landsliðsmaður. Vefsíðan HITC Sport greinir frá þessu en þar kemur einnig fram að fleiri lið í ensku úrvalsdeildinni hafi áhuga á leikmanninum, m.a. Aston Villa, Birmingham, Wolves og Reading.
Arnór hefur farið vel af stað með Norrköping í sænsku deildinni og lagt upp þrjú mörk í fjórum leikjum. Arnór hefur líka stimplað sig rækilega inn hjá landsliðinu með þremur mörkum og það hefur eflaust sitt að segja hvað varðar áhuga annarra liða.
