Arnór Ingvi missir líklega af næsta landsleik vegna meiðsla
Var tæklaður hressilega í leiknum gegn Eyjamönnum og tognaði á fæti.
Landsliðskappinn Arnór Ingvi Traustason, einn besti maður Keflvíkingar í Pepsi-deildinni í knattspyrnu meiddist á fæti í leiknum við ÍBV í gær. Hann missir af síðasta leik Keflavíkur gegn Breiðabliki um næstu helgi.
Að sögn Trausta Hafsteinssonar föður hans verður Arnór frá í einhvern tíma en hann tognaði eftir tæklingu leikmanns ÍBV. Arnór fór á heilsugæslu eftir brotið sem kom í fyrri hálfleik og var óttast um að mjög slæm meiðsli væri að ræða en úrskurðurinn var tognun. Arnór var lykilmaður í 21 árs landsliði Íslands í síðasta leik og nú er vafamál hvort hann verði orðinn góður í fætinum þegar næsti leikur fer fram í byrjun október.
Ekki er ólíklegt að þetta hafi verið síðasti leikur Arnórs með Keflavík því vitað er um áhuga erlendra liða á kappanum. Hann reyndi fyrir sér í atvinnumennsku hálft árið í Noregi í fyrra en ákvað að vera með Keflavík í sumar. Hann hefur verið burðarás í Keflavíkurliðinu á þessu tímabili og honum hefur verið spáð frama í atvinnumennsku.
Arnór á leið á heilsugæsluna í sjúkrabíl en á hinni myndinni aðeins hressari en þó á hækjunum að samfagna með félögum sínum eftir leikinn. VF-myndir/Páll Orri.
