Arnar Freyr til UMFG

Enn virðist kvarnast úr meistaraliði Keflavíkur í körfuknattleik því Arnar Freyr Jónsson hefur nú komist að munnlegu samkomulagi um að leika með Grindvíkingum á næsta ári. Þetta kemur fram á vísi.is í dag.

 

Arnar Freyr, sem er leikstjórnandi, hefur leikið allan sinn feril með Keflavík og unnið með þeim fjölmarga titla. Hann var einmitt lykilmaður í liði meistaranna í fyrra, en stríddi við meiðsli árið þar áður.

 

Þannig hafa tveir lykilmenn Keflavíkur yfirgefið skútuna, en fyrirliðinn Magnús Þór Gunnarsson skrifaði undir samning við erkifjendurna í Njarðvík fyrir skemmstu.

 

Ljóst er að Grindvíkingar verða ekki með árennilegt lið á næsta vetri því fyrir hafa þeir tryggt sér starfskrafta Brenton Birmingham og Damon Bailey auk annarra.