Allur ágóði af leik Keflavíkur og Tindastóls rennur í Minningasjóð Ölla

Þriðji leikur Keflavíkur og Tindastóls fer fram í Blue-höllinni á morgun og hefst klukkan 17:99, með sigri tryggja Keflvíkingar sér sæti í undanúrslit úrslitakeppni Domino's-deildar karla.

Stjórn körfuknattleiksdeildar Keflavíkur gaf út tilkynningu í dag þess efnis að allur ágóði af leiknum muni renna í Minningarsjóð Ölla.

Í tilkynningunni segir m.a.: „Örlygur Aron Sturluson hefði orðið 40 ára í dag en Minningarsjóður Ölla var stofnaður til minningar um körfuknattleiksmanninn Örlyg Aron Sturluson sem var eitt mesta efni í sögu íslensks körfubolta. Minningarsjóður Ölla styrkir börn til íþróttaiðkunar sem ekki eiga kost á því vegna bágrar fjárhagsstöðu foreldra eða umsjónamanna. Börn í Keflavík hafa notið góðs af styrkjum úr Minningarsjóð Ölla og fyrir það erum við afar þakklát og viljum þakka fyrir!“

Allir stuðningsmenn ereu hvattir til að fjölmenna í Blue-höllina og hita upp fyrir Eurovision. Hægt er að nálgast miða í Keflavíkurbúðinni, keflavikurbudin.is/