Vopnaðir menn tóku á móti björgunarsveit á Garðskaga

Björgunarsveitin Ægir í Garði var kölluð út síðdegis vegna manna sem taldir voru í vanda á rifi úti fyrir Garðskaga.

Tilkynnt var um fólk sem væri hugsanlega í vanda í Lambarifi á Garðskaga. Neyðarlínan kallaði til lögregluna á Suðurnesjum og Björgunarsveitina Ægi. Þar var strax mannaður björgunarbátur sem sendur var að Lambarifi.

Þar tóku hins vegar vopnaðir menn á móti björgunarsveitarmönnum. Þeir voru að skjóta fugla í rifinu og amaði ekkert að þeim.

Það var fólk sem var að njóta góða veðursins á Garðskaga sem hafði séð til fólks í rifinu og taldi það í vanda og hafði því samband við Neyðarlínuna.

Björgunarsveitarmenn snéru því við frá rifinu og veiðimennirnir komu sér sjálfir í land.

Meðfylgjandi myndir voru teknar í útkallinu nú áðan. VF-myndir: Hilmar Bragi Bárðarson



Hér má sjá mennina í Lambarifi.





Bátur Björgunarsveitarinnar Ægis á siglingu úti fyrir Garðskaga. Þrátt fyrir gott veður er talsverður sjór.



Björgunarbáturinn á kemur að landi í Gerðum.