Vogastrætó flytur um 7000 farþega í ár

Notendum „Vogastrætó“ heldur áfram að fjölga. Verkefnið hófst sem tilraunaverkefni árið 2011, með því að hafinn var akstur milli þéttbýlisins og mislægra gatnamóta Reykjanesbrautar, í tengslum við akstur almenningsvagna á milli Reykjanesbæjar og höfuðborgarsvæðisins.

Fyrsta heila árið (2012) var farþegafjöldinn 1.912 og árið 2015 var talan komin í 6.257. Það sem af er þessu ári hefur farþegum fjölgað um 10 prósent frá síðasta ári, svo enn er stígandinn upp á við.

Í nýliðnum nóvember var slegið met í farþegafjölda, en alls tóku sér 873 manns far með Vogastrætó þennan mánuð. Að óbreyttu stefnir í að farþegafjöldinn í ár verði um 7.000 farþegar. Ljóst er að þjónusta þessi er komin til að vera, enda er hún vel nýtt af íbúum sveitarfélagsins.