Vogamenn hvattir til dáða í bólinu
– og þeim fjölgar hraðar í ár en fyrra
Vogamenn og meyjar tóku vel í hvatningu bæjarstjórans síns fyrir ári síðan þegar þeir voru hvattir til dáða í bólinu með hugmyndum um ástarviku svipaðri þeirri sem Bolvíkingar efna til árlega.
Nú eru tíu börn á fyrsta aldursári í Vogum en voru aðeins sex um svipað leyti í fyrra.
„Við erum ef til vill að sjá árangurinn,“ segir Ásgeir Eiríksson, bæjarstjóri í Vogum, í vikulegum pistli sem hann sendir þeim bæjarbúum er þess óska.
Bæjarstjórinn fylgist vel með íbúatölum í Vogum og hefur íbúum fjölgað um þrjá á viku undanfarnar þrjár vikur. Vogamenn eru í dag 1130 talsins.
