Vmst og Björgin semja um starfsendurhæfingu

Vinnumálastofnun og Björgin, geðræktarmiðstöð Suðurnesja, undirrituðu í dag samning um starfsendurhæfingu til ársloka 2017. Þjónustusamningurinn er á sviði starfsendurhæfingar fyrir fólk með geðraskanir. Björgin mun sinna sértækum endurhæfingaraðgerðum og gefa einstaklingum sem er vísað þangað færi á að komast aftur út á vinnumarkaðinn eða skipta um starfsvettvang, til dæmis að undangengnu frekara námi.

Þjónustan felst meðal annars í því að hvetja þátttakendur til aukinnar sjálfseflingar, virkni og lífsgæða og stuðlar það að því að þeir fái notið sín sem fullgildir samfélagsþegnar á forsendum eigin getu og styrkleika. Í þessu felst einstaklingsbundinn stuðningur, mat á þjónustuþörf, vinnuprófun, þátttaka í virkniúrræði, undirbúningur fyrir vinnu, greining á atvinnutækifærum, aðstoð við atvinnuleit, gerð atvinnuumsókna, eftirfylgni og tímabundinn stuðningur á vinnustað ef með þarf.