VÍS lokar í Reykjanesbæ
- afgreiða Suðurnesjamenn í gegnum síma og net
VÍS lokar skrifstofu sinni í Reykjanesbæ og sameinar við skrifstofu í Reykjavík í kjölfar endurskipulagningar fyrirtækisins þar sem aukin áherslu verður lögð á á einfaldara fyrirkomulag þjónustu og stafrænar lausnir. Alls verður átta skrifstofum allt í kringum landið lokað. Lokunin kemur til framkvæmdar 1. október.
Samkvæmt upplýsingum frá VÍS, sem birtar voru á vef Fréttablaðsins, var starfsfólki á þeim skrifstofum sem sameinast öðrum boðin ný staða á nýrri sameinaðri skrifstofu og var fólki í einhverjum tilfellum boðið að vinna sína vinnu í fjarvinnu. Engum var því sagt upp á þeim skrifstofum.
Í tilkynningu frá VÍS segir að samskipti við viðskiptavini fari í síauknum mæli fram í gegnum net og síma og samkvæmt þjónustukönnunum hafi viðskiptavinir kallað eftir aukinni þjónustu á þeim vettvangi. Áherslu- og skipulagsbreytingin eigi því að svara því kalli viðskiptavina VÍS.
