Vill ekki auðvelda aðgang að gosstöðvunum

Fannar Jónasson, bæjarstjóri Grindavíkur, var gestur Vikuloka á Rás 1 í morgun. Þar var hann m.a. spurður um sína skoðun á því að gera bílastæði við Vigdísarvelli til að auðvelda almenningi aðgang að svæðinu.

Fannar segist ekki hrifinn af þeirri hugmynd að útbúa bílastæði við Vigdísavelli til að stytta vegalengd gangandi að gosstöðvunum og bendir á að þar sé um að ræða hættusvæði, því myndi hann frekar vilja skoða möguleika á fjöldatakmörkunum við gosstöðvarnar. Víða erlendis hafi þeirri aðferð verið beitt við álíka aðstæður, þegar öll bílastæði eru upptekin þá lokar viðkomandi svæði þar með.

Hann segir samstarf við landeigendur hafa verið mjög gott en það sé hægara sagt en gert að útbúa þannig aðgengi með tilheyrandi raski á náttúru og segir að náttúran, s.s. mosinn sem er mjög viðkvæmur, þoli illa þá auknu aðsókn sem fylgi takmarkalausu aðgengi.