Vilja Elliða frekar en Ragnheiði Elínu
67,5% líklegri til að kjósa Sjálfstæðisflokkinn ef Elliði leiðir listann
Sjálfstæðismenn í Suðurkjördæmi eru mun líklegri til að kjósa flokkinn ef Elliði Vignisson verður þar í fyrsta sæti, fremur en Ragnheiður Elín Árnadóttir Iðnaðar- og viðskiptaráðherra. Þetta kemur fram Í nýlegri könnun sem stuðningsmenn Elliða létu Maskínu vinna. Þar sögðust 67,5% líklegri til að kjósa Sjálfstæðisflokkinn ef Elliði leiddi listann í stað Ragnheiðar Elínar oddvita flokksins.
Úrtak könnuninnar var 529 kjósendur í Suðurkjördæmi. Rúmlega 61% þeirra sem tóku afstöðu til þessara tveggja einstaklinga vildu heldur að Elliði, sem er bæjarstjóri í Vestmannaeyjum, leiddi lista Sjálfstæðisflokksins í Suðurkjördæmi en Ragnheiður Elín.
Könnunin var lögð fyrir þjóðgátt Maskínu á netinu. Íslendingar af báðum kynjum á aldrinum 18-75 ára í Suðurkjördæmi tóku þátt. Spurt var tveggja spurninga:
1.Hvort vilt þú að Elliði Vignisson bæjarstjóri í Vestmannaeyjum eða Ragnheiður Elín Árnadóttir ráðherra leiði lista Sjálfstæðisflokksins í Suðurkjördæmi í næstu Alþingiskosningum?
2. Værir þú líklegri eða ólíklegri til að kjósa Sjálfstæðisflokkinn í næstu Alþingiskosningum ef Elliði Vignisson myndi leiða listann í Suðurkjördæmi en ekki Ragnheiður Elín Árnadóttir?
