Vilja bætta þjónustu við Suðurstrandarveg og Nesveg
Fjölmargir ökumenn lent í vandræðum á þessum leiðum
Bæjarráð Grindavíkurbæjar skorar á Vegagerðina að bæta söltun og aðra vetrarþjónustu á Nesvegi (sem liggur frá Grindavík til Hafna) og Suðurstrandarvegi. Undanfarna daga hafa fjölmargir ökumenn lent í verulegum vandræðum á þessum leiðum vegna hálku, og hefur Björgunarsveitin Þorbjörn þurft að fara í fjölda útkalla vegna þessa. Þetta kemur fram í bókun frá fundi ráðsins sem haldinn var á þriðjudaginn sl.
Bæjarráð skorar þá jafnframt á Vegagerðina að koma upp mælum og upplýsingaskiltum á Grindavíkurveg um loft- og veghita og vindstyrk, eins og tíðkast um fjölmarga þjóðvegi.
