Viggo Mortensen á Íslandi

Samkvæmt heimildum Víkurfrétta er Viggo Mortensen staddur hér á Íslandi en ekki er þó vitað um áætlanir hans hér á landi.

Viggo kom til Reykjanesbæjar þar síðasta sumar og hitti Gunnar Marel, sem kallaður hefur verið „skapari“ víkingaskipsins Íslendings, og fór í siglingu með honum á stóra fleyginu.

Gunnar Marel og Viggo urðu góðir vinir eftir siglinguna en sá síðarnefndi var hér á landi ásamt syni sínum á ferðalagi. Víkurfréttir höfðu samband við Gunnar Marel og vildu fá að vita hvort Aragorn sjálfur, úr frægu myndunum Lord of The Rings, væri nokkuð í kaffi.

„Nei hann er ekki kominn ennþá en ég á nú svo sem ekki von á því að hann kíki í kaffi þar sem Íslendingur er lengur á floti,“ sagði Gunnar Marel.

Íslending hefur verið stillt við hliðina á Stekkjarkoti og hefur það sjónarspil vakið sérstaka athygli að sögn Gunnars. „Það hefur töluverð umferð verið þarna í kring og margir komið til að berja hann augum,“ sagði Gunnar.

Töluvert af rútum á leið með farþega til og frá Keflavíkurflugvelli hafa stoppað við Stekkjarkot og hefur bæði erlent og innlent fólk komið og skoðað Íslending. „Við ætlum að setja upp einhverja dagskrá þannig að fólk getur komið og skoðað hann og jafnvel að ég verði þarna einhvern hluta af deginum til að sýna og segja fólki frá.“

„Þetta er náttúrulega óplægður akur þarna en Íslendingur er rétt hjá þeim stað þar sem nýtt hús yfir hann mun rísa við sjávarmálið,“ sagði Gunnar.

„Við vissum að þetta myndi vekja athygli en bjuggumst ekki við svona mikilli athygli,“ sagði Gunnar.